សម្ដេចហ៊ុនសែន៖”កម្ពុជា កែលម្អផ្លូវជាតិលេខ២១ សម្រាប់បង្កើនទំនាក់ទំនងពាណិជ្ជកម្មជាមួយវៀតណាម”
28-March-2016 | ដោយ មែន កំសត់
ភ្នំពេញ៖ កម្ពុជា ប្រើប្រាស់ថវិកាជាង៦១លានដុល្លាសហរដ្ឋអាមេ រិកសម្រាប់កែលម្អផ្លូវជាតិលេខ២១ ដើម្បីដោះ ស្រាយបញ្ហាកកស្ទះ និងបង្កើនទំនាក់ទំនងពាណិជ្ជកម្មរវាងកម្ពុជានិងវៀតណាមឲ្យកាន់តែមានទំហំធំឡើង។
ថ្លែងក្នុងពិធីបើកការដ្ឋានស្ថាបនាផ្លូវជាតិលេខ២១ ពីរង្វង់មូលតាខ្មៅឆ្ពោះទៅជ្រៃធំ ដែលប្រារព្វធ្វើឡើងនៅស្រុកស្អាងខេត្តកណ្តាល នាព្រឹកថ្ងៃទី២៨ មីនា នេះ សម្តេច តេជោ ហ៊ុន សែន នាយករដ្ឋមន្ត្រីកម្ពុជា បានលើកបង្ហាញពីសារសំខាន់របស់ផ្លូវនេះ ថា៖ បានតភ្ជាប់រវាងទីក្រុងទៅជនបទ និងភ្ជាប់ពីកម្ពុជាទៅប្រទេសវៀតណាម។សម្តេចបានបញ្ជាក់អំពីការកែលម្អឲ្យប្រសើឡើងនូវផ្លូវជាតិលេខ២១នេះ តាមរយៈការកសាងស្ពាននិងពង្រីកផ្លូវឲ្យទូលាយ ដើម្បីដោះស្រាយការលំបាក ក្នុងការធ្វើដំណើរ ដោយសារតែការកើនឡើងនៃចំនួនយានយន្តជាលំដាប់នោះ។
សម្ដេច ហ៊ុន សែនបានបន្ដថា៖”កំណើនកើនឡើងនូវចំនួនយានយន្តគ្រប់ប្រភេទបានដាក់ឲ្យប្រទេសរបស់យើងស្ថិត ក្នុងសភាពការមួយដ៍លំបាកអំពីបញ្ហាផ្លូវស្ពាននេះឯងដូច្នេះទាមទារឲ្យរកថវិកាដើម្បីសាងសង់។ យោងទៅលើការចំណាយសម្រាប់ការសាងសង់ផ្លូវនេះរហូតទៅដល់ជាង៦១លានដុល្លារសហរដ្ឋអា មេរិក ក្នុងនោះហិរញ្ញប្បទានពីរដ្ឋាភិបាលកូរ៉េចំនួន៥២លាន ហើយថវិការបដិភាគរបស់រាជរដ្ឋាភិបាលប្រមាណជិត១០លាន។ នេះគ្រាន់តែផុតដំណាក់កាលទី១ប៉ុណ្ណោះ នៅដំណាក់កាលទី២ ជាង៨ គីឡូទៀត។បើពិនិត្យអំពីចំនួនផ្លូវដែលយើងបានសាងសង់៦៣.៦គីឡូ...ដែលតម្រូវឲ្យយើងចំណាយប្រាក់ច្រើន សម្រាប់ការសាងសង់ទៅលើស្ពានដែលត្រូវឆ្លងកាតទាំងនោះ។
ផ្លូវជាតិលេខ២១នេះនឹងធ្វើការពង្រីករហូតដល់ទទឹង២១ម៉ែត្រ ដើម្បីដោះស្រាយការដឹកជញ្ជូនអ្នកដំណើរ និងផលិតផលក្នុងស្រុក ទៅកាន់តំបន់ទីផ្សារ ហើយរួមទាំងការដោះស្រាយការកកស្ទះសម្រាប់ការដឹកជញ្ជូនធនធ្ងន់ផងដែរ។ ជាមួយគ្នានេះផ្លូវនេះនឹងជួយ ទៅដល់ការបង្កើនទំហំពាណិជ្ជកម្មរវាងកម្ពុជានិងវៀតណាម តាមរយៈការដឹកជញ្ជូនផ្គត់ផ្គងទំនិញ និងភស្តុភា ដ៍សំខាន់រវាងរាជធានីភ្នំពេញនិងទីក្រុងកងថឺរបស់វៀតណាម ដែលកំពង់មានការអភិវឌ្ឍនិងរីកចំរើនគួរឲ្យកត់សំគាល់។
ឯកឧត្តមត្រាំ អ៊ីវតឹក រដ្ឋមន្ត្រី ក្រសួងសាធារណការនិងដឹកជញ្ជូន បានឲ្យដឹងថា គម្រោងផ្លូវនេះចែកជាពីរដំណាក់កាលក្នុងនោះដំណាក់កាលទី១ មានប្រវែងផ្លូវ ៥៥គីឡូម៉ែត្រ, មានទទឹងពី១០ ដល់២១ម៉ែត្រ សាងសង់ ដោយចាក់បេតុងកៅស៊ូAC ក្នុងនោះមានលូជ្រុង១៧កន្លែង ស្ពានចំនួន ៤២កន្លែង ។ រយៈពេល សាងសង់ ចំនួន ៣០ខែ ដោយគិតចាប់ពីថ្ងៃទី៧ ខែមេសា ឆ្នាំ ២០១៥ រហូតដល់ថ្ងៃទី ៦ ខែតុលា ឆ្នាំ ២០១៧ បច្ចុប្បន្នសម្រេចបាន ៦,៨៣% ។
ដំណាក់កាលទី២ មានប្រវែងផ្លូវ ៨,៦គីឡូម៉ែត្រ សាងសង់ដោយចាក់បេតុងកៅស៊ូAC ក្នុងនោះ មានលូជ្រុង ១កន្លែង ស្ពាន១១កន្លែង ដែលនឹងសុំឥណទានបន្ថែម ហើយបច្ចុប្បន្នក្រសួង សាធារណការ និងដឹកជញ្ជូនបានរៀបចំសំណើគម្រោងជូនទៅ ក្រសួងសេដ្ឋកិច្ចនិងហិរញ្ញវត្ថុ ដើម្បី អន្តរាគមន៍បន្តទៅរដ្ឋាភិបាលសាធារណរដ្ឋកូរ៉េ ។ដោយឡែកកំណាត់ផ្លូវប្រវែង១,៩៦គីឡូម៉ែត្រ តភ្ជាប់ទៅដល់ព្រំប្រទល់កម្ពុជា-វៀតណាមគ្រោង ប្រើប្រាស់ថវិកាជាតិ ។
ផ្លូវជាតិលេខ២១ គឺជាផ្លូវមួយដែលមានចម្ងាយជិតជាងគេ ពីភ្នំពេញទៅវៀតណាម ។ ផ្លូវជាតិនេះ បានចាប់ផ្ដើមធ្វើការស្ដារ ទន្ទឹមគ្នានឹងនយោបាយតភ្ជាប់និងសមាហរណកម្មផ្ទៃក្នុងជាតិ។ កន្លងមកផ្លូវជាតិលេខ២១ នេះមានលក្ខណៈតូច ចង្អៀត ស្ពានទ្រុឌទ្រោម មិនអាចធ្វើចរាចរណ៍ដឹកជញ្ជូនដោយប្រសិទ្ធភាពនោះឡើយ។ កំណាត់ផ្លូវនេះ ធ្វើការស្ដារឡើងវិញក្នុងអំឡុងឆ្នាំ២០០៣ ដោយហិរញ្ញប្បទានចំរុះពីធនាគារអភិវឌ្ឍន៍អាស៊ី ចាប់ពី រង្វង់មូលតាខ្មៅ ដល់ឃុំព្រែកអំបិល(គីឡូម៉ែត្រលេខ៤៥) និងថវិកាជាតិ ចាប់ពីឃុំព្រែកអំបិល (គីឡូម៉ែត្រលេខ៤៥)ដល់ជ្រៃធំ។
ឯកឧត្តម គីម វុនជីន(Kim Weon Jin)ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជាមានប្រសាសន៍គម្រោងកែលម្អផ្លូវជាតិលេខ២១នេះ គ្រោងនឹងបញ្ចប់រួចរាល់នៅខែកញ្ញាឆ្នាំ២០១៧ខាងមុខ រួមមានការជួសជុលនិងក្រាលកៅស៊ូឡើងវិញ ការកសាងលូ និងស្ពានជាច្រើនកន្លែងដើម្បីតភ្ជាប់ប្រទេសកម្ពុជា ជាមួយនឹងប្រទេសវៀតណាម។
ឯកឧត្តមបានគូសបញ្ចវាក់ថាកូរ៉េកំពុងយកចិត្តទុកដាក់យ៉ាងខ្លាំងក្នុងការរួមចំណែកដល់ការអភិវឌ្ឍប្រទេស កម្ពុជា ជាប្រទេសលេខរៀងទី៤ ស្ថិតក្នុងគោលដៅសហប្រតិបត្តិការជាមួយកូរ៉េ។ រហូតមកដល់បច្ចុប្បន្ននេះ រដ្ឋាភិបាលកូរ៉េបានផ្តល់ជំនួយដល់ប្រទេសកម្ពុជាចំនួន៤៧០លានដុល្លារសហរដ្ឋអាមេរិក។
ដោយឡែកនៅក្នុងឆ្នាំនេះគ្រោងនឹងផ្តល់ជំនួយចំនួន៥១លានដុល្លាសហរដ្ឋអាមេរិកបន្ថែមទៀត។ ដោយកត់សំគាល់ឃើញថាកម្ពុជាមានភូមិសាស្ត្រអំណោយផលនៃមជ្ឈមណ្ឌលដឹកជញ្ចូនដ៍ធំមួយនៅអាស៊ាន ទើបធនាគានីហារណអាហារណកូរ៉េ បានសហការជំរុញលើការពង្រីកហេដ្ឋារចនាសម្ពន្ធ័ដឹកជញ្ជូននិងចរាចរណ៍នៅកម្ពុជា៕
ចំនួនអ្នកទស្សនា
- ថ្ងៃនេះ5261
- ម្សិលមិញ12921
- សប្តាហ៍នេះ5261
- ខែនេះ199861
- ឆ្នាំនេះ199861
- សរុប20642317